សេអ៊ូល៖ យោធាកូរ៉េខាងត្បូងបានរាយការណ៍ថា ព្រឹកនេះកូរ៉េខាងជើងបានបាញ់សាកល្បងកាំជ្រួចមីស៊ីលរយៈចម្ងាយខ្លីចំនួនពីរគ្រាប់ពីអាកាសយានដ្ឋានក្នុងទីក្រុងព្យុងយ៉ាងរបស់ខ្លួន ដែលជាការសាកល្បងលើកទីបួនក្នុងខែនេះ។
ជាមួយគ្នានេះជប៉ុនក៏បានរាយការណ៍ពីការបាញ់បង្ហោះនេះផងដែរ ដោយបានចាត់ទុកថាជាការគំរាមកំហែងដល់សន្តិភាព និងសន្តិសុខក្នុងតំបន់។
ក្នុងរយៈពេលមិនបានពីរសប្តាហ៍ផង កូរ៉េខាងជើង បានធ្វើការសាកល្បងកាំជ្រួចមីស៊ីលចំនួន៣ដងរួចទៅហើយ។ ការបាញ់២ដងជាប្រភេទ "កាំជ្រួចដែលមានល្បឿនលឿន" ដែលមានសមត្ថភាពល្បឿនលឿន និងហោះបានឆ្ងាយ ខណៈដែលការសាកល្បងកាលពីថ្ងៃសុក្រពាក់ព័ន្ធនឹងមីស៊ីលផ្លោងរយៈចម្ងាយខ្លីមួយគូ (SRBMs) ចេញពីរថភ្លើង។
អគ្គសេនាធិការចម្រុះរបស់កូរ៉េខាងត្បូង (JCS) បាននិយាយនៅក្នុងសេចក្តីថ្លែងការណ៍មួយថា ការបាញ់បង្ហោះកាលពីថ្ងៃច័ន្ទហាក់ដូចជាពាក់ព័ន្ធនឹងគ្រាប់ផ្លោងចំងាយខ្លីចំនួនពីរដែលបានបាញ់ចេញពីភាគខាងកើតនៃអាកាសយានដ្ឋាន Sunan ក្នុងទីក្រុងព្យុងយ៉ាង។
កូរ៉េខាងជើង ក៏បានប្រើប្រាស់អាកាសយានដ្ឋានដើម្បីបាញ់សាកល្បងមីស៊ីលផ្លោងរយៈចម្ងាយមធ្យម Hwasong-12 (IRBM) ក្នុងឆ្នាំ ២០១៧ ដោយមានមេដឹកនាំ គីម ជុងអ៊ុន ជាអ្នកដឹកនាំផ្ទាល់តែម្តង។
JCS បាននិយាយនៅក្នុងសេចក្តីថ្លែងការណ៍មួយថា កាំជ្រួចដែលបានបាញ់កាលពីថ្ងៃចន្ទ ហោះបានប្រហែល ៣៨០គីឡូម៉ែត្រទៅកម្ពស់ខ្ពស់បំផុត ៤២គីឡូម៉ែត្រ។
រដ្ឋមន្ត្រីក្រសួងការពារជាតិជប៉ុន លោក Nobuo Kishi បាននិយាយថា មីស៊ីលទាំងនោះហាក់ដូចជាបានធ្លាក់ក្នុងមហាសមុទ្រ ក្បែរឆ្នេរសមុទ្រភាគខាងកើតរបស់ប្រទេសកូរ៉េខាងជើង។
លោកបានប្រាប់អ្នកយកព័ត៌មានថា៖ «វាគឺជាភស្តុតាងដោយខ្លួនឯងថា គោលបំណងនៃការបាញ់មីស៊ីលញឹកញាប់របស់កូរ៉េខាងជើង គឺដើម្បីកែលម្អបច្ចេកវិទ្យាមីស៊ីលរបស់ពួកគេ»។
លោក Kishi បានបន្ថែមថា ការបាញ់ម្តងហើយម្តងទៀតនៃមីស៊ីលផ្លោងរបស់កូរ៉េខាងជើងកំពុងក្លាយជាបញ្ហាធ្ងន់ធ្ងរសម្រាប់សហគមន៍អន្តរជាតិរួមទាំងប្រទេសជប៉ុនផងដែរ ដោយលោក Kishi បានបន្ថែមថា ការបាញ់បង្ហោះជាបន្តបន្ទាប់គឺជាការបំពានលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដែលហាមឃាត់ប្រទេសកូរ៉េខាងជើងពីការអភិវឌ្ឍន៍មីស៊ីលផ្លោងទាំងអស់៕